પાટણનાં બાલીસણા પાસે રોડ પર બાઇક સ્લિપ થતાં પાછળ બેઠેલી મહિલાનું મોત

Patan : પાટણ તાલુકાનાં બાલીસણા ગામ નજીક આવેલી નાની કેનાલ પાસે મંગળવારે રોજ સવારે 7-45 વાગ્યાના સુમારે બાઈક ઉપર પાછળ બેઠેલી એક મહિલા નીચે પડી જતાં ગંભીર ઇજાઓ થતાં તેને પાટણ તાલુકાનાં સંડેર ગામના દવાખાને લઈ જતાં તેમને મૃત જાહેર કરાયા હતા. આ બનાવ અંગે બાઇકનાં ચાલકે બાલીસણા પોલીસ મથકે ફરિયાદ નોંધાવી હતી.

વિસનગર તાલુકાનાં બોકરવાડા ગામના હરિસિંહ તથા તેમનાં ભાઈની પત્ની સુર્યાબેનને લઈને પાટણ તાલુકાનાં બબાસણા ગામે આવતાં હતા ત્યારે પાટણનાં બાલીસણા ગામ પાસે એક નાની કેનાલ પર પહોંચતાં રોડ વરસાદનાં કારણે ભીનો હોવાથી અને રોડ ઉપર થોડી માટી પડેલી હોવાથી અને તેઓને જવાની ઉતાવળ હોવાથી બાઇક સ્પીડમાં ચલાવતાં હોવાથી માટી ઉપર બાઇકનું ટાયર આવી જતાં સ્ટીયરીંગ પરનો કાબુ ગુમાવતાં બાઈક સ્લીપ ખાઈ જતાં બાઇક ચાલક અને પાછળ બેઠેલા તેમનાં ભાભી નીચે પટકાતાં તેમને ગંભીર ઈજાઓ થયેલી હતી. તે બેભાન થઈ ગયા હતા. તેમને 108માં સારવાર માટે સંડેરની સરકારી દવાખાને લઈ જતાં સુર્યાબેનને મૃત જાહેર કરાયા હતા.

આ બનાવની કરુણતાતો એ હતી કે, આજે આ આ અકસ્માતમાં મૃત્યુ પામનાર સુર્યાબેનનાં પતિ ફતાજી આઠેક માસ પૂર્વે નિધન થયેલું છે. બાઈક ચાલક હરિસિંહ તથા તેમનાં ભાભી બંને જણા આજે ફતાજીની સાસરી પાટણનાં બબાસણા ગામે તેમનાં સાળાની સગાઈનાં પ્રસંગે જતા હતા. ત્યારે આ દુર્ઘટના બની હોવાનું હરિસિંહે તેમની ફરિયાદમાં જણાવ્યું હતું.